معراج قسطہ ۵
ملفوظات گھمن ۵
معراج جسمانی ہوئی ہے!
بعض لوگوں نے رسول اللہ صلی اللہ علیہ وسلم کے معراج جسمانی کا انکار کیا ہے ۔ وہ کہتے ہیں کہ معراج روحانی ہوئی ہے یعنی حضور اکرم صلی اللہ علیہ وسلم کا جسم اطہر نہیں گیا بلکہ فقط حضور صلی اللہ علیہ وسلم کی روح مبارک گئی ہے ۔ جبکہ اہل السنۃ والجماعۃ کا نظریہ یہ ہے کہ اللہ کے نبی صلی اللہ علیہ وسلم کو صرف روحانی معراج نہیں بلکہ جسمانی معراج ہوئی ہے، اس لئے کہ روحانی معراج حضور اکرم صلی اللہ علیہ وسلم کا کمال نہیں ہے ۔ کوئی بندہ یہاں سویا ہوا ہو اور دیکھے کہ میں آسمان پر گیا ہوں ، میں عرش پر گیا ہوں ، میں مکہ گیا ہوں ، میں مدینہ گیا ہوں تو یہ کوئی کمال نہیں ہے کیوں کہ صرف روح تو عام بندے کی بھی جاسکتی ہے ۔ اللہ کے نبی صلی اللہ علیہ وسلم کا اعزاز اور اعجاز یہ ہے کہ حضور پاک صلی اللہ علیہ وسلم کی صرف روح نہیں بلکہ جسم بھی ساتھ جائے ۔ اس لئے ہمارے علماء کہتے ہیں کہ آج کے دور میں جب کوئی کہے کہ ہم معراج مانتے ہیں تو ان سے یہ پوچھیں کہ معراج مانتے ہو یا معراج جسمانی مانتے ہو؟ کیوں کہ وہ کہے گا معراج اور نیت کرے گا روحانی کی ، روحانی پر اختلاف نہیں ہے اختلاف تو معراج جسمانی پر ہے۔
بالکل اسی طرح جس طرح رسول اللہ صلی اللہ علیہ وسلم موت کے بعد قبر مبارک میں زندہ ہیں ۔ اگر کوئی بندہ کہے کہ ہم حضور اکرم صلی اللہ علیہ وسلم کوزندہ مانتے ہیں تو آپ نے پوچھنا ہے کہ حیات روحانی مانتے ہو یا جسمانی مانتے ہو؟ ورنہ لوگ دھوکہ دیں گے حیات کہہ کر اور روحانی مان کر ڈنڈی مار جائیں گے ۔ معراج کہیں گے اور روحانی مان کر ڈنڈی مار لیں گے ۔
ہم وفات کے بعد حضور صلی اللہ علیہ وسلم کی حیات بھی جسمانی مانتے ہیں اور مکہ سے عرش تک حضور اکرم صلی اللہ علیہ وسلم کا معراج بھی جسمانی مانتے ہیں۔
کتبہ ماجد کشمیری
