قرآن مجید اگر سب کے لیے راہ نما کتاب ہے پھر ہدًی للمتقین کیوں؟
سوال(١) قرآنِ کریم تو سب کے لئے راہ نما کتاب ہے، آگے (آیت ۱۸۵) میں ہے: (ہدًے للناس) پھر متقین کی تخصیص کیوں کی۔
جواب:اگر متقین کے معنی ہیں: اللہ سے ڈرنے والے تو متقین عام ہے، جو بھی اللہ سے ڈرتا ہے قرآن اس کو راستہ دکھاتا ہے، چاہے وہ ایمان لایا ہو یا نہ لایا ہو، اسی کو طاعت کا فکر اور معصیت کا ڈر ہوگا۔ اور وہی قرآن کی باتوں پر کان دھرے گا اور ایمان لائے گا، ہاں نڈر لوگ نکل جائیں گے، نکل جانے دو ان کو ! ان سے کسی چیز کی امید ہی نہیں!
اور اگر متقین سے نیک مؤمنین مراد ہیں تو پھر اس میں اشارہ ہے کہ اللہ کی کتابوں کی راہ نمائی سے کوئی مستغنی نہیں، انبیاء اور اولیاء بھی اللہ کی راہ نمائی کے محتاج ہیں، کیونکہ دنیا بھول بھلیاں ہے، بڑے شہر کے رہنے والے کو بھی شہر میں گھومنے کے لئے گائڈ بک کی ضرورت ہوتی ہے، اسی طرح متنقی بھی قرآن کی راہ نمائی کے محتاج ہیں۔
( قرآن کریم کا راز (بھید)
اور الم کو حروف مقطعات کہتے ہیں، یہ بھید ہیں، بوجہ مصلحت ان کے معانی کھولے نہیں گئے، اور بعض اکابر نے جو ان کے معانی بیان کئے ہیں وہ تاویل ہیں، اور متشابہات کی تاویل جائز ہے مگر اس کو مراد خداوندی نہیں کہیں گے۔ الم ذلک الکتب لا ریب فيه هدى للمتقین
ترجمہ: الف لام میم، اس کتاب میں کوئی شک نہیں، اللہ سے ڈرنے والوں کو راہ بتلانے والی ہے!
ہیز گاروں کے پانچ اوصاف
اللہ سے ڈرنے والوں میں پانچ باتیں ہوتی ہیں:
ا- وہ پسِ پردہ جو حقائق ہیں ان کا مشاہدہ کئے بغیر محض مخبر صادق کی اطلاع سے مانتے ہیں۔
۲. وہ نماز قائم کرتے ہیں یعنی ہمیشہ رعایتِ حقوق کے ساتھ وقت پر نماز ادا کرتے ہیں۔
۳- وہ اللہ کے بخشے ہوئے مال میں سے کچھ خرچ کرتے ہیں، یعنی زکات نکالتے ہیں اور دوسری خیراتیں کرتے ہیں۔
۴ - وہ اللہ کی تمام کتابوں کو بشمولِ قرآنِ کریم مانتے ہیں کہ سب اللہ کی کتابیں برحق ہیں، کیونکہ وہ سب ایک چشمہ سے نکلی ہوئی نہریں ہیں، البتہ وہ عمل قرآن پر کرتے ہیں، کیونکہ سابقہ کتابیں منسوخ ہوچکی ہیں۔
۵- وہ آخرت کو بھی مانتے ہیں کہ اس دنیا کے بعد دوسری دنیا آئے گی جس میں جزاو سزا ہوگی۔
(ناکام لوگوں کی علامت)
جن لوگوں میں یہ پانچ باتیں پائی جاتی ہیں وہ ہدایت یافتہ اور کامیاب ہیں، اور جو نعمتِ ایمان اور اعمالِ حسنہ سے محروم میں ان کی دنیاو آخرت دونوں برباد ہیں۔
ہدایات القرآن: از شیخ الحدیث دارالعلوم دیوبند مفتی سعید احمد پالنپوری رحمہ اللہ
مرتب: ماجد کشمیری حفظہ اللہ
کوئی تبصرے نہیں:
ایک تبصرہ شائع کریں
ویب گاہ کی بہتری کے لیے آپ کی قیمتی رائے ہمارے لیے اہم اور اثاثہ ہے۔