السلام علیکم ورحمت اللہ وبرکاتہ
سلسلۂ تخریج الاحادیث نمبر 6
ایک تیری چاہت ہے ایک میری چاہت ہے
اس روایت کے متعلق بہت سے دار الافتاء نے تحقیق کی ہے ان میں سے کچھ فتویٰ ملاحظہ فرمائیں۔
دار الافتاء : جامعہ علوم اسلامیہ علامہ محمد یوسف بنوری ٹاؤن۔
حدیثِ قدسی اللہ تعالیٰ کے اس کلام کو کہتے ہیں جو قرآن کا حصہ نہ ہو اور رسول اللہ ﷺ نے اس کو نقل فرمایا ہو، چنانچہ کسی بات کو حدیثِ قدسی کہنا اس وقت درست ہوگا جب اس بات کا اللہ تعالیٰ کے کلام کے طور پر رسول اللہ ﷺ سے منقول ہونا ثابت ہو۔
جہاں تک سوال میں مذکورہ روایت کی بات ہے تو کتب حدیث میں مذکورہ روایت صرف ایک کتاب ’’نوادر الاصول‘‘ للحکیم الترمذی (المتوفی بین ۲۸۵۔۔۲۹۰ھ او نحو ۳۲۰ھ) میں ملتی ہے، جس کے الفاظ یہ ہیں:
"حدثنا عمر بن ابی عمر قال: حدثنا عبد الوہاببن نافع عن مبارک بن فضالۃ عن الحسن قال: قال اللہ تعالی: (لداود علیہ السلام) یا داؤد! ترید وارید ویکون ما ارید، فاذا اردت ماارید کفیتک ما ترید، ویکون ما ارید، واذا اردت غیر ما ارید عنیتک فیما ترید ویکون ما ارید".
(نوادر الاصول فی احادیث الرسول، الاصل الخامس و العشرون و المائۃ فی ان سعادۃ ابن آدم الاستخارۃ و الرضیٰ بالقضاء (2/ 107)ط:دار الجیل، بیروت)
ترجمہ:حضرت حسن بصری رحمہ اللہ سے روایت ہے کہ اللہ تعالیٰ نے حضرت داؤد علیہ السلام سے فرمایا : اے داؤد ایک تیری چاہت ہے اور ایک میری چاہت ہے، ہوگا تو وہی جو میری چاہت ہے، پس اگر تم اپنی چاہت کو میری چاہت کے تابع کر دو تو میں تمہاری چاہت کے لیے بھی کافی ہو جاؤں گا (یعنی تمہاری چاہت بھی پوری کر دوں گا)، اور بہرحال ہوگا تو وہی جو میں چاہوں گا، اور اگر تمہاری چاہت میری مرضی کے خلاف ہو تو میں تمہیں تمہاری چاہت میں تھکا دوں گا (یعنی پوری کوشش کے باوجود تمہاری چاہت پوری نہیں ہوگی) اور ہوگا تو پھر بھی وہی جو میری چاہت ہے۔
لیکن مذکورہ روایت کو حدیثِ قدسی تسلیم کرنے سے دو باتیں مانع ہیں، ایک یہ کہ اس روایت میں مذکورہ فقرہ رسول اللہﷺسے نقل نہیں کیا گیا ہے، بلکہ حضرت حسن بصری رحمہ اللہ سے منقول ہے؛ اس لیے اس فقرہ کو حدیثِ قدسی نہیں مانا جاسکتا، مزید یہ کہ اس روایت کی سند بھی انتہائی کمزور ہے؛ کیوں کہ حضرت حسن بصری رحمہ اللہ تک کی سند میں مذکور تینوں راوی متکلم فیہ ہیں۔ (عمر ابن ابی عمر اور عبد الوھاب بن نافع انتہائی درجہ کے ضعیف راوی ہیں، جب کہ مبارک ابن فضالہ مدلس ہیں اور یہ روایت ان سے ’’عن‘‘ کے ساتھ منقول ہے)، لہٰذا اس روایت کا خود حضرت حسن بصری رحمہ اللہ سے ثابت ہونا بھی محل نظر ہے۔
البتہ اس روایت کو معنیً درست قرار دیا جاسکتا ہے، کیوں کہ یہ روایت سند کے بغیر بعض شروحِ حدیث اور زہد و تصوف کی کتب میں مذکور ہے۔ جیسے:
۱)قوت القلوب(۲؍۱۴ )لابی طالب مکی (المتوفیٰ:۳۸۶ھ)
۲)احیاء علوم الدین(۴؍۳۴۶ )للامام الغزالی (المتوفیٰ:۵۰۵ھ)
۳)مرقاۃ المفاتیح شرح المشکوٰۃ (۴؍۱۵۶۶ )ملا علی القاری ( المتوفیٰ:۱۰۱۴ھ)
لیکن ان کتب میں مذکور ہونے کے باوجود روایت کے الفاظ کا ضعف ختم نہیں ہوگا، کیوں کہ ایک تو ان کتب میں یہ روایت سند کے بغیر مذکور ہے، دوسری بات یہ بھی ہے کہ یہ مصنفین حضرات حکیم ترمذی رحمہ اللہ سے متاخر ہیں، اس لیے ظاہر یہی ہے کہ انہوں نے حکیم ترمذی ہی کی روایت کو سند اور حوالہ کے بغیر نقل کیا ہے۔
خلاصہ یہ ہوا کہ چوں کہ اس روایت میں حدیثِ قدسی ہونے کی شرائط بھی مکمل نہیں ہیں، اور سند بھی انتہائی درجے کی ضعیف ہے،اس لیے اس روایت کو حدیثِ قدسی کہنا اور حدیثِ قدسی کے عنوان سے آگے نقل کرنا درست نہیں ہے، البتہ مذکورہ مشائخؒ کا اس عبارت کو ذکر کرنا، اس کے معنی اور مضمون کے درست ہونے کی علامت ہے، چنانچہ اس عبارت یا جملوں کو انہی حضرات کی طرف منسوب کرکے ان کے حوالہ سے ذکر کیا جائے تو اس میں حرج نہیں ، لیکن حدیثِ قدسی کہہ کر نقل کرنا جائز نہیں۔
منہج النقد فی علوم الحدیث (ص: 323):
"الحدیث القدسی: ہو ما اضیف الی رسول اللہ صلی اللہ علیہ وسلم واسندہ الی ربہ عز وجل. مثل: "قال رسول اللہ صلی اللہ علیہ وسلم واسندہ الی ربہ عز وجل، مثل: "قال رسول اللہ صلی اللہ علیہ وسلم فیما یروی عن ربہ"، او"قال اللہ تعالی فیما رواہ عنہ رسول اللہ صلی اللہ علیہ وسلم". ویقال لہ ایضاً: الحدیث الالہی، او الربانی.
ومناسبۃ تسمیتہ "قدسیاً" ہی التکریم لہذہ الاحادیث من حیث اضافتہا الی اللہ تعالی، کما انہا واردۃ فی تقدیس الذات الالہیۃ، قلما تتعرض لاحکام الحلال والحرام، انما ہی من علوم الروح فی الحق سبحانہ وتعالی".
حاشیۃ نوادر الاصول ( ص:۳۴۶ )
(ایک حدیث قدسی مشہور ہے: "ایک میری چاہت ہے، ایک تیری چاہت ہے، ہوگا وہی جو میری چاہت ہے، پس اگر تو نے خود کو سپرد کردیا اس کے جو میری چاہت ہے تو میں تجھے دوں گا وہ جو تیری چاہت ہے، اور اگر تو نے مخالفت کی اس کی جو میری چاہت ہے تو میں تھکا دوں گا تجھے اس میں جو تیری چاہت ہے، پھر بھی ہوگا وہی جو میری چاہت ہے"۔ کیا یہ حدیث مستند ہے؟
جواب
یہ روایت حکیم ترمذی رحمہ اللہ [ یہاں پر یہ بات واضح ہونی چاہیے ۔حکیم ترمذی کا نام سن کر یا پڑھ کر بعض حضرات کو اس سے شبہ لگ جاتا ہوگا کہ اس سے مراد مشہور محدث امام ترمذی ہے جن کی کتاب ”الجامع السنن“ پڑھی پڑھائی جاتی ہے لیکن واضح رہے کہ یہ دونوں شخصیات الگ الگ ہیں مشہور محدث کا نام ابو عیسیٰ محمد بن عیسیٰ الترمذی ہے اور جن حکیم ترمذی کا نام ابو عبد اللہ محمد بن علی بن الحسن الحکیم الترمذی ہے ان کا انتقال سن: ۲۸۵ھ اور ۲۹۰ھ کے درمیان ہوا ہے۔(ملاحظہ ہو:لسان المیزان ۷/۳۸۷ ] کی کتاب "نوادر الاصول" میں درج ہے، لیکن محدثین نے اسے موضوع (من گھڑت) قرار دیا ہے، لہذا اس کو حدیث کی حیثیت سے بیان کرنا درست نہیں۔ فقط واللہ اعلم )
ماخذ :دار الافتاء جامعۃ العلوم الاسلامیۃ بنوری ٹاؤن
فتوی نمبر :143811200008
جمع و ترتیب : خادم الاسلام ماجد ابن فاروق کشمیری
